Live-in partner tinodas ng Marino

Binaril at napatay ng isang seaman ang kanyang ka-live-in matapos ang mainitang pagtatalo sa kanilang tahanan sa Caloocan City, kamakalawa ng gabi.

Patay na nang idating sa Tondo General Hospital ang biktimang si Edna Sebon, 42, ng Area 5, Kawal St., Dagat-dagatan, Caloocan City.

Samantala, nadakip naman ng pulisya ang suspect na si Armando Nillos, 41.

Nabatid na naganap ang insidente dakong alas- 9 ng gabi nang marinig ng mga kapitbahay ang mainitang pagtatalo ng dalawa. Ilang sandali pa ay narinig ang malakas na putok ng baril.

Mabilis na inalam ng kanilang mga kapitbahay ang pangyayari hanggang sa makita nila na nakahandusay at duguan ang biktima.

Tumakas pa ang suspect subalit agad din siyang natunton ng mga awtoridad. (Ulat ni Rose Tamayo)