Sekyu todas sa magnanakaw

Isang security guard ng Video City ang pinagbabaril hanggang sa mapatay ng isang pinaghihinalaang miyembro ng robbery syndicate matapos na mabuko ng una ang tangkang panloloob ng huli sa nasabing establisimiyento kahapon ng umaga sa Caloocan City.

Dead-on-arrival sa Nodados Hospital ang biktimang si Benico Sibugon, 35, may-asawa, empleyado ng Chancellor Security Services and Corporation at naninirahan sa Phase 8, Bagong Silang ng nabanggit na lungsod.

Nabigo naman ang pulisya sa pagtukoy sa pagkakakilanlan ng suspek na mabilis na tumakas matapos ang insidente.

Base sa ulat, ganap na alas-10:30 ng umaga nang maganap ang insidente sa harap mismo ng nasabing establisimiyento.

Bigla na lamang lumutang ang suspek at pinagbabaril ang walang kamalay-malay na biktima bago ito tumakas. (Ulat ni Rose L. Tamayo)