Pajero nina JC at Melissa Mendez kinarnap

Tinangay ng hindi pa nakikilalang karnaper ang sasakyan ng sexy actor na si Joennie "JC" Castro, 30 habang nakaparada sa harap ng isang restaurant, kamakalawa ng gabi sa Quezon City.

Personal na dumulog sa CPD Station 10 si Castro ng Maximo St., Grace Park, Caloocan City kasama ang live-in partner nito, ang aktres na si Melissa Mendez upang i-report ang pagkawala ng kanilang sasakyan na isang Mitsubishi Pajero model 2002 na kulay midnight blue at wala pang plaka.

Base sa sumbong dakong alas-10:30 hanggang alas-11:45 ng gabi nang iparada nila ang kanilang sasakyan sa tapat ng Elephant Square sa panulukan ng Tomas Morato at Scout Fernandez sa Barangay Laging Handa, Quezon City.

Binanggit pa ni JC na maka-ilang ulit na rin umano siyang nagparada sa naturang lugar kaya hindi niya inaasahan na mangyayari ang ganoon. (Ulat ni Doris Franche)