Mag-ina grabe sa nabokyang akyat-bahay

Kritikal ngayon ang buhay ng isang ginang at 3-taong gulang na anak nito matapos pagsasaksakin ng tinedyer na magnanakaw na nagalit matapos na walang matangay na pera o alahas nang pasukin nito ang bahay ng biktima, kamakalawa ng hapon sa Pasig City.

Nilalapatan ng lunas sa loob ng Pasig City General Hospital ngayon ang mag-inang sina Virginia Salvador, 29, na nagtamo ng tatlong saksak sa katawan at anak niyang si Ginalyn, kapwa residente ng Nagpayong 2, Barangay Pinagbuhatan ng naturang lunsod.

Nakakulong naman ngayon sa Pasig detention cell ang suspek na si Reynaldo Masong, 16 anyos, residente ng Phase 7 Pinalad Homeowners, Nagpayong 2 ng naturang barangay.

Sa ulat ng pulisya, nabatid na pinasok ng naturang magnanakaw ang bahay ng mga biktima dakong alas-5 ng hapon kung saan nasa kasarapan ng pagtulog ang mag-ina.

Nakapasok umano ang suspek sa pamamagitan ng pagbasag sa salaming bintana ng bahay. Agad na hinalughog nito ang aparador at mga kagamitan ngunit nabigong makakita ng pera o alahas na matatangay.

Dito naman nagising ang batang si Ginalyn na nag-umpisang umiyak kaya agad itong sinaksak sa tagiliran ng suspek. Nagising din naman ang ina nito na agad namang pinag-undayan din ni Masong.

Nabulabog naman ang mga residente sa pagsigaw ng saklolo ni Salvador kung saan nakubkob ng mga kapitbahay at tanod si Masong na nagtangkang tumakas bitbit ang martilyo at patalim na ginamit sa krimen. (Ulat ni Danilo Garcia)