PDEA, NCRPO nag-agawan sa kredito sa nadakip na drug suspects

Urong-sulong ang naganap na presentasyon kahapon sa anim na nadakip na drug suspect matapos na mag-agawan sa kredito ang Philippine Drug Enforcement Agency (PDEA) at National Capital Region Police Office (NCRPO).

Iprinisinta kahapon dakong alas-11:30 ng umaga sa tanggapan ng PDEA ang mga nadakip na suspect na sina Danilo Bayani, 35; Edrie Andaya, 41; Roberto dela Cruz, 45; Nestor Gutierrez, 47; Alex Maulama, 27; at Abdul Jabar Ulamay.

Inilabas na ng mga tauhan ng PDEA sa likod ni Spokesman Sr. Supt. Primo Galongay ang mga suspect at nag-umpisa nang kuhanan ng litrato ng mga mamamahayag nang ipatigil at ipapasok muli ni NCRPO Spokesman Sr. Supt. Julius Cesar Abanez.

Ikinatwiran ni Abanez na hindi pa umano oras na ilabas ang mga suspect dahil sa hindi pa dumarating si NCRPO Chief Deputy Director General Reynaldo Velasco.

Narekober sa kanila ang 26 na sachet ng shabu na nagkakahalaga ng P130,000, Toyota Rav4 (URU-813) at isang kalibre .45 baril.

Nadakip naman dakong alas-6 kamakalawa ng gabi sina Maulama at Ulamay sa isang buy-bust operation sa may SM Centerpoint sa Sta. Mesa, Manila kung saan nakuha sa kanila ang 35 gramo ng shabu. (Ulat nina Danilo Garcia at Doris Franche)