Basurero pisak sa garbage truck

Halos hindi na makilala ang mukha ng isang kolektor ng basura makaraang aksidenteng masagasaan ng kanilang truck na pinaandar ng isa niyang kasamahan, kahapon ng madaling araw sa Valenzuela City.

Patay na nang idating sa Valenzuela General Hospital ang biktimang si Benjie Amper, 40, ng Malanday, Valenzuela City.

Agad namang naaresto ng pulisya ang nakasagasa na si Marlon Villegas, 24, ng nasabi ring lungsod.

Batay sa ulat, dakong alas-5 ng madaling araw ng maganap ang nasabing insidente sa tambakan ng basura sa Rubber Master Road, Lingunan ng nasabing lungsod.

Nabatid na katatapos lamang magdala nina Amper ng basura sa nasabing tambakan.

Dahil sa pagod pansamantalang nagpahinga si Amper at umupo sa di kalayuan.

Samantala, pinakialaman umano ni Villegas ang manibela ng truck kahit hindi ito marunong magmaneho dahilan upang bigla itong umandar at nagtuluy-tuloy sa kinauupuan ng biktima. (Ulat ni Jhay Quejada)