Kuya tinodas ni utol

"Wala kang utang na loob, pati si nanay pinalalayas mo!"

Ito umano ang sigaw ng isang 29-anyos na binata habang sinasaksak ang kanyang kuya kamakalawa ng gabi sa Malabon.

Namatay noon din sanhi ng tatlong saksak sa sikmura ang biktimang si Rolando Zamora, 34, ng Daang Bakal St., Brgy. Tenejeros, Malabon, habang kusang-loob namang sumuko sa pulisya ang suspect na si Joey.

Sa imbestigasyon ng pulisya, dakong alas-8 ng gabi nang mangyari ang insidente sa loob ng bahay ng mga ito.

Nabatid na kinompronta ng suspect ang biktima dahil pinalalayas umano sa bahay ng huli ang kanilang ina.

Nasa kainitan ng pagtatalo ang magkapatid nang biglang pumasok sa kusina si Joey at nang lumabas ay may hawak na itong patalim at walang sabi-sabing inundayan ng saksak ang kanyang kuya.

Mabilis na isinugod sa Tondo General Hospital ang biktima, agad na sumuko sa pulisya ang suspect. (Ulat ni Rose Tamayo)