12 prosti nalambat

Labindalawang sex worker umano ang nadakip ng pulisya sa isinagawang operasyon dahil sa umano’y pagbebenta ng mga ito ng panandaliang aliw kamakalawa ng gabi sa 3rd Avenue, Caloocan City.

Ang mga naarestong kababaihan ay kasalukuyang nahaharap sa kasong prostitusyon at bagansiya ay nakilalang sina Jenelyn Cobarubias, 19; Cathy Alvarez, 10; Arlyn Arrante, 19; Judith Menez, 22; Joy Antonio, 21; Shiela Cauilo, 22; Ana Manday, 19; Emma Sena, 19; Sonia Amante, 21; Jenny Mercado, 21; Carol Heretura, 19 at Jovelyn Perez, 20, pawang mga residente ng naturang lugar.

Sa ulat ng pulisya, pasado alas-7:15 ng gabi nang magsagawa ng saturation drive ang mga tauhan ng Station Intelligence and Investigation Division (SIID) ng Caloocan City Police sa kahabaan ng 3rd Avenue ng nasabing lungsod.

Diumano, unang nakatanggap ng impormasyon ang mga awtoridad hinggil sa mga kababaihan sa naturang lugar na diumano’y nagbebenta ng mga panandaliang aliw pagsapit ng gabi. (Ulat ni Rose Tamayo)