Pharmacist sinundo, dinala sa 'biglang liko' ng manliligaw

Nagsampa ng reklamong panggagahasa ang isang 22 anyos na dalaga laban sa kanyang manliligaw matapos umanong siyang sapilitang ipasok sa isang motel kamakalawa ng hapon sa Makati City.

Ang biktima ay itinago sa pangalang Nannette, pharmacist ng San Lorenzo South Subdivision ,Sta. Rosa, Laguna habang ang suspek na naaresto ng pulisya ay nakilalang si JB Madrigal, 22, binata ng Pedro Gil st., Malate, Maynila.

Batay sa pahayag ni Nannette, dakong alas-3:50 kamakalawa ng siya ay sunduin sa kanyang pinapasukan sa San Andres Bukid ng suspek na kanyang manliligaw.

Nagtiwala umano si Nannette sa suspek kaya tiwala itong sumama dito na hindi nito sukat akalain na siya ay dadalhin sa isang motel sa Brgy. Guadalupe Nuevo ng nasabing lungsod dakong alas-5:30 ng hapon.

Ayon kay Nannette, puwersahan umano siyang pinasok ng suspek sa motel at sa kabila ng kanyang panlalaban ay nanaig ito at naisakatuparan ang kanyang makamundong pagnanasa.

Pagkatapos ay iniwan ng suspek ang biktima sa motel na nagpasiyang magharap ng reklamo sa pulisya.

Mariin namang itinanggi ng suspek ang akusasyon dahil sa kagustuhan nila pareho ang nangyari at siya ay hindi manliligaw kundi nobyo ng biktima. (Ulat ni Lordeth Bonilla)