Montayre, mga galamay kinasuhan sa marahas na rali

Pormal na kinasuhan kahapon ang secretary general ng People’s Consultative Assembly (PCA) na si Linda Montayre sampu ng mga miyembro nito dahil sa pambabato sa isang opisyal ng pulisya sa naganap na madugong rali sa pagitan ng mga tauhan ng pulisya at raliyista sa may Nagtahan flyover noong Lunes ng gabi.

Kasong serious physical injuries, direct assault at violation of BP 880 o Public Assembly Act ang isinampa ng Western Police District sa Manila Prosecutors Office laban sa grupo ni Montayre.

Kabilang din sa sinampahan ng kaso ay ang mga miyembro ng militanteng grupong Maradeka at ang chairperson nitong si Nashir Pangandapon na umano’y nakipagsabwatan sa PCA upang simulan ang pambabato.

Magugunitang magang-maga ang mukha ni Supt. Rafael Corpuz, nang matinding tamaan ng pambabato ng mga raliyista.

Bukod dito, posible pa umanong maapektuhan ang paningin ng nabanggit na pulis dahil sa matinding tama.

Magugunitang mismong si Pangulong Arroyo ang dumalaw kay Corpuz sa loob ng pagamutan kamakalawa. (Ulat ni Andi Garcia)