Kawani ng city hall naipit ng jeep at water tank

Isang babaeng kawani ng Makati City Hall Office ang nasawi matapos itong maipit ng pampasaherong jeep at water tanker habang nagpuputol ng sanga ng puno kahapon ng umaga sa nabanggit na lungsod.

Dead-on-arrival nang isugod sa Ospital ng Makati ang biktima na nakilalang si Arlene Espera, nakatalaga sa Environment and Sanitation (DES), Makati City Hall Office at nakatira sa #1704 San Maximo St., Brgy. Olympia ng nabanggit na lungsod.

Sugatan at ginagamot sa nabanggit na ospital ang isa pang biktima na nakilalang si Mamerto Morata Jr.

Samantala, sumuko sa pulisya ang driver na si Sabri Yusof, ng GHQ Village, Brgy. Signal Village, Taguig.

Ayon sa ulat, naganap ang insidente dakong alas-9:30 kahapon ng umaga sa kahabaan ng Kalayaan Avenue ng lungsod na ito.

Nabatid na kasalukuyang nagpuputol ng mga sanga sa puno ang mga biktima at hindi namalayan ng mga ito ang paparating na pampasaherong jeep na minamaneho ni Yusof nang nawalan ng preno at bumangga sa water tank na malapit lamang sa biktima.

Sinamang-palad na maipit si Espera at nadamay naman si Morata. (Ulat ni Lordeth Bonilla)