Kotse vs bus: 6 sugatan

Matapos manggaling sa masayang birthday party, trahedya naman ang sinapit ng anim na katao na pawang magkapamilya matapos sumalpok sa isang bus ang sinasakyan nilang kotse, kamakalawa sa Taguig.

Nasa malubhang kalagayan ang mga biktimang nakilalang sina Irma Gentile, 36; mga anak nitong sina Kenneth, 9; Irwin, 7; James, 6; pinsang si Karen Yulo, 21 at ang driver na si Renante Gelloano, 24.

Ayon sa imbestigasyon ni SPO4 Oscar Alicando, ng Taguig Traffic Enforcement Unit, naganap ang insidente dakong alas-5:30 ng hapon sa kahabaan ng East Service Road, Brgy. Western Bicutan, Taguig,

Nabatid na minamaneho ni Gelloano ang isang KIA Ceres sakay ang magpamilya na nanggaling sa kasayahan sa Makati City.

Napag-alaman na nakainom ang driver at habang binabagtas nito ang nasabing lugar ay nawalan ng preno ang sasakyan hanggang sa sumalpok sila sa isang bus na pag-aari ng DCOMMP Transport Cooperative na minamaneho naman ng isang Jaime Kla, 50.

Mabilis na isinugod ang mga biktima sa pagamutan, samantalang kusang-loob namang sumuko si Kla. (Ulat ni Lordeth Bonilla)