Driver binoga ng sikyu, dedo

Matapos magkaasaran dahil sa kantiyaw, isang driver ang binaril at napatay ng isang security guard, kahapon ng umaga sa Parañaque City.

Hindi na umabot nang buhay makaraang isugod sa Parañaque Community Hospital ang biktima na nakilalang si Danilo Olivia, ng Barangay Tambo ng nabanggit na lungsod sanhi ng tama ng bala ng baril na tinamo sa katawan.

Kaagad namang tumakas ang suspect na nakilalang si Lloyd Libanan, 35, ng Bayview Drive, ng nabanggit ding barangay.

Base sa isinagawang imbestigasyon, naganap ang insidente dakong alas 10:15 kahapon ng umaga sa loob ng Astro-Shoe Company sa nabanggit ng lugar. Napag-alaman na ang suspect ay nakatalagang guwardiya at ang biktima naman ay driver sa nabanggit na kompanya.

Kinantiyawan umano ng biktima ang suspect hanggang sa ang mga ito ay magkapikunan. Nagalit umano ang suspect dahilan upang bunutin nito ang kanyang service firearm at iputok ng malapitan kay Oliva. Matapos ang isinagawang pamamaril mabilis na tumakas ang suspect.

Patuloy naman ang isinasagawang imbestigasyon ukol dito. (Lordeth Bonilla)