Kongreso nilusob ng mga senior citizens

Nagrali kahapon sa tapat ng Mababang Kapulungan ng Kongreso ang mahigit sa isang daang mga lolo at lola upang igiit ang pagpasa ng Magna Carta for Older Persons.

Sa isang maikling programang isinagawa ng mga matatandang raliyista, nagsindi ng kandila, nanalangin at pagkatapos ay nag-noise barrage ang mga ito upang iparating sa mga kongresista ang kanilang kahilingan.

Ang mga matatanda, ayon sa Coalition of Services of the Elderly, Inc. (COSE) ay nagmula pa umano sa iba’t ibang panig ng Metro Manila.

Ayon kay Beatriz Guano, 60, isang community health workers mula sa Sangandaan Elderly Organization sa Caloocan City, kahit matanda na ay kailangan pa rin nilang magrali sa lansangan upang ipaalala sa gobyerno ang matagal na nilang hinihinging social benefits.

Hindi umano sapat ang ibinibigay na 20 porsiyentong diskuwento para sa mga katulad nilang senior citizens.

Kabilang sa mga nais nilang ibigay sa kanila ng pamahalaan ay burial benefits, livelihood programs, health, housing at pension dahil hindi umano sila maaaring umasa na lamang sa kanilang mga anak. (Malou Rongalerios-Escudero)