Pagkawala ng shabu sa NBI, inside job - solon

Isang inside job umano ang misteryosong pagkawala ng siyam na kilo ng shabu sa National Bureau of Investigation (NBI).

Ito ang naging akusasyon kahapon ni House Assistant Minority Floor Leader Gilbert Remulla kaugnay sa nawawalang shabu na nagkakahalaga ng P20 milyon.

Maliwanag aniya na talagang nagaganap ang recycling at muling pagbebenta ng mga nahuhuling shabu ng ilang tiwaling tauhan ng pamahalaan.

Inirekomenda ni Remulla ang agarang pagbuo ng isang special team mula sa Department of Justice (DOJ) upang masusing imbestigahan ang pagkawala ng nasabing shabu.

"Isa itong seryosong insidente. Paano mawawala ang ipinagbabawal na gamot kung mismong tauhan ng pamahalaan ang involve sa pagpapakalat nito," pahayag pa ni Remulla.

Dapat lamang umanong kuwestiyunin ang liderato ni NBI director Reynaldo Wycoco dahil sa kanyang kapabayaan.

Nakapagtataka aniya na hindi kaagad naipaliwanag ni Wycoco ang pagkawala ng shabu sa kabila ng katanungan ng mga media.

Kaugnay nito, sinabi pa ni Remulla na panahon na para amyendahan ang Republic Act 6425 o Dangerous Drugs Acts of 1972 upang agarang masunog ang mga ilegal na droga na nakukumpiska ng pulisya.

Sa ilalim ng panukala, hindi na kakailanganin pa ang physical presentation sa korte ng mga nahuhuling illegal drugs upang maiwasan ang pagbabalik ng mga ito sa pamilihan.

Samantala, inihayag naman kahapon ni DOJ Undersecretary Manuel AJ Teehankee na nagtatag na sila ng isang komite para magsagawa ng masusing pagsisiyasat sa kasong pagkawala ng may siyam na kilo ng shabu. (Ulat nina Malou Escudero at Grace Amargo)