P10.5-M naabo sa Caloocan at Valenzuela City

Tinatayang aabot sa P10 milyong halaga ng mga ari-arian ang naabo matapos ang magkahiwalay na sunog sa Caloocan at Valenzuela City kamakalawa.

Batay sa ulat ng Bureau of Fire and Protection (BFP) na unang nagkasunog sa Champion Machine Shop dakong alas-5:30 ng hapon.

Lumalabas sa imbestigasyon na sumabog ang isang makina na nasa ikalawang palapag ng nasabing pagawaan na pag-aari ng isang Howard King na matatagpuan sa J. Teodoro st., kanto ng 2nd Avenue, Grace Park, Caloocan City.

Sa lakas ng pagsabog ay agad na nasunog ang mga light materials sa loob ng nasabing pagawaan na umabot sa fifth alarm.

Dakong alas-6:50 nang maapula ng mga bumbero ang sunog.

Samantala, dakong alas-7:30 ng gabi nang masunog naman ang High Label Enterprises na pag-aari ng isang Elvin Chan, na nasa Bonifacio st., East Canumay, Valenzuela City.

Napag-alaman din na ang sunog ay nagsimula sa sumabog na makina sa loob ng production section ng nasabing pabrika.

Wala namang naiulat na nasaktan o namatay sa dalawang sunog. (Ulat ni Gemma Amargo)