5-anyos ginulpi, pinasakan ng barbecue stick sa ari ng lasenggang ina

Matinding kalbaryo ang sinapit ng isang 5-anyos na batang babae sa kamay mismo ng kanyang lasenggang ina, matapos na palagian siyang gulpihin nito at hindi pa nasiyahan ay pinapasakan pa ng barbecue stick ang ari ng bata, sa Caloocan City.

Ang biktimang itinago sa pangalang Mariz ay sinamahan ng kanyang amang si Ferdinand Sudario sa himpilan ng pulisya para ipagharap ng sumbong ang dating kinakasama na ina ng bata na si Zenaida delos Reyes.

Base sa salaysay ni Sudario, nadiskubre lamang umano ang pang-aabuso ni Zenaida sa kanilang anak kamakailan lamang.

Nabatid na naghiwalay sina Sudario at Zenaida at naiwan sa kustodya ng ina ang bata.

Marahil dahil sa matinding sama ng loob, ang anak ang siyang pinagbuntunan ng galit ng suspect.

Ayon sa ulat, sa tuwing ito ay malalasing ay palagi na lamang binubugbog ang bata. Ipinagtapat din ng bata na madalas umanong pasakan ng kanyang nanay ng barbecue stick ang kanyang ari.

Matapos matuklasan ni Sudario ang kalbaryong sinapit ng anak ay agad nitong ipinagharap ng sumbong ang dating ka-live-in.

Patuloy namang pinaghahanap ng mga awtoridad si delos Reyes na mabilis na tumakas matapos malamang sinampahan siya ng kaso. (Ulat ni Gemma Amargo)