Buntis iniwan ng lover nagbigti

Dahil sa sobrang sama ng loob ng isang babae na limang buwang buntis matapos na iwanan ng kanyang live-in partner, winakasan nito ang kanyang buhay sa pamamagitan ng pagbibigti sa loob ng inuupahang silid kahapon ng hapon sa Tondo, Maynila.

Patay na nang matagpuan ang biktima na kinilalang si Elizabeth Sanola, 28, tubong Davao, ng Parola Compound Tondo.

Sa imbestigasyon ng Western Police District-Homicide Division, dakong alas-12:26 ng hapon nang maganap ang insidente sa loob ng silid ng biktima.

Natuklasan lamang ang pagpapatiwakal ng biktima gamit ang pinagdugtong-dugtong na kumot, nang dumating ang may-ari ng bahay na inuupahan ng una na si Judith Belbis, 46.

Ayon naman sa pamangkin ng biktima na si Lusany Sanola, 17, bago ang insidente, narinig niya ang kanyang tiyahin at ang ka-live-in nito na nagngangalang Obet na nag-aaway kamakalawa ng gabi.

Nabatid na iiwanan na umano ng lalaki ang biktima upang bumalik sa tunay nitong pamilya. (Ulat ni Ellen Fernando)