Family feud; 1 todas

Natapos na ang matagal nang alitan ng dalawang pamilya matapos na saksakin ng ice pick ng isang lalaki ang kanyang bayaw ng mag-krus ang kanilang landas kamakalawa ng gabi sa Novaliches, Quezon City.

Ang nasawi ay nakilalang si Rodel Rodriguez ng Ibayo st., ng nasabing lugar matapos na magtamo ng mga saksak sa iba’t ibang parte ng katawan.

Naaresto ng mga istambay ang suspek na si Alvin Samson, 27, tricycle driver at bayaw ng nasawi.

Sa ulat ng pulisya, dakong alas-8 ng gabi nang masalubong ng biktima sa harap ng kanyang bahay ang suspek.

Dahil sa may matagal ng alitan ang kanilang mga pamilya sa hindi pa malamang dahilan ay nagtalo ang mga ito hanggang sa bumunot ng ice pick ang suspek at pinagsasaksak ang biktima sa sikmura.

Nagtangkang tumakas ang suspek subalit ilang mga tambay ang nagmagandang loob at kanilang hinuli ito at saka isinurender sa pulisya. (Ulat ni Angie dela Cruz)