Daming sakit sa katawan, nagpakamatay

Dahil hindi kayang labanan ang mga sakit na diabetes, tuberculosis at sakit sa bato na dinaranas ng isang sanitary inspector ng University of the Philippines (UP), mas pinili pa nitong magpatiwakal sa pamamagitan ng pagtalon sa gusali ng unibersidad kamakalawa ng gabi sa Quezon City.

Namatay sa isang lugar na pinangyarihan si Nicanor Librella, 48, ng #13 Pook Dagohoy dahil sa pagkabagok ng ulo at pagkabali ng mga buto sa katawan nito.

Sa report ni PO2 Joseph Dino ng Criminal Investigation Unit ng Central Police District (CIU-CPD) na bago ang pagpapakamatay ay nagpa-check-up pa dakong alas-12:30 si Librella sa UP Infirmary dahil sa mga nasabing sakit nito.

Dakong alas-6:30 ng gabi ay nagtungo sa ikaapat na palapag ng National Engineering building ang biktima at saka tumalon.

Sa salaysay ng anak ng biktima na si Nomer, dahil hindi na umano makayanan ng kanyang ama ang sakit ay nag-leave pa ito upang magpatingin sa klinika.

Sinabi naman ng mga kasamahan ng biktima sa janitorial services na halos hindi sila nakakilos nang biglang tumalon sa gusali si Librella. Akala umano nila ay abala lamang ito sa paglilinis at hindi nila akalain na may binabalak itong magpakamatay. (Ulat ni Jhay Mejias)