Estudyante tinusok dahil sa computer games

Isang 13-anyos na high school student ang sinaksak ng kapwa nito estudyante matapos na magtalo at magkapikunan ang mga ito dahil sa computer games na "counter strike", kamakalawa ng gabi sa Makati City.

Ginagamot sa Ospital ng Makati ang biktima na si Richel Lindly Godinez (lalaki), ng #36 Cattleya St., Brgy. Rizal, ng lungsod na ito sanhi ng malalim na saksak sa katawan buhat sa isang patalim.

Samantala, nakakulong naman sa Makati City Police detention cell ang suspek na itinago sa pangalang Randy, 14, 1st year high school sa Fort Bonifacio High School, Blk. 68, Lot 42, Makati City.

Ayon sa record na nakatala sa Makati City Police Complaint Desk, naganap ang insidente dakong alas-7 kamakalawa ng gabi sa kahabaan ng Begonia st., Brgy. Rizal, ng lungsod na ito.

Nabatid na naglalaro umano ng counter strike sa computer ang suspek at biktima nang magkapikunan at magsuntukan.

Dahil dito, umuwi muna ang suspek at kumuha ng kutsilyo at binalikan ang kaaway at sinaksak ito.

Sinabi naman ng suspek na ipinagtanggol lamang niya ang sarili dahil pinagtulungan umano siya ng biktima at dalawa pang kabataang lalaki na kasama nito.

Dinakip ng mga rumespondeng tanod ang batang suspek, samantala ang biktima naman ay dinala sa nabanggit na pagamutan. (Ulat ni Lordeth Bonilla)