Sa kabila ng pagtatangkang itago ni Sr. Insp. Cris Galvez, hepe ng District Investigation Division ang mga pangyayari sa media, nabatid na pinapaaresto ni NPDO director C/Supt. Vidal Querol ang mga nagwalang pulis na sina PO1’s Christopher Managadilis, Gilbert Balingan at Jackson Danong, pawang mga nakatalaga sa Police Patrol Unit (PPU).
Ayon sa ulat ng pulisya, dakong alas-3 ng madaling-araw nang manggulo ang tatlong pulis sa barracks ng District Mobile Force (DMF) sa Maypajo, Caloocan City.
Nabatid na lasing na lasing sa alak ang tatlong pulis at naisipan ng mga ito na pumunta sa barracks ng DMF upang kumuha ng police trainee na kanilang pagpapraktisang bugbugin.
Ngunit pagdating ng mga suspect sa barracks ay hindi ito pinayagan ng nagbabantay na si SPO1 Dabu ng Special Weapons and Tactics (SWAT) na pumasok na siyang dahilan upang magalit ang una at magwala hanggang sa pagtulungan si Dabu.
Sa puntong ito ay naglabasan ang ibang mga training police hanggang sa magkaroon ng rambulan sa loob ng barracks at magresponde ang iba pang mga kagawad ng Malabon at Caloocan police upang mapayapa ang gulo rito.
Dahil sa kahihiyang inabot ng DMF ay pinabugbog nito ang tatlo samantalang nakatakdang sibakin sa puwesto ang mga ito. (Ulat ni Gemma Amargo)