Holdaper tinodas ng kakosa

Isang 18-anyos na holdaper ang napaslang ng isa ring holdaper nang mag-krus ang landas ng mga ito sa isang shooting incident sa Quezon City, kahapon ng madaling-araw.

Nakilala ang biktimang si Eduardo Riguer Jr., ng #1237 Bambang St., Sta. Cruz, Maynila na sinasabing miyembro ng M-5 gang at Joey Dennis Olbis, 19, mekaniko ng #3008 Sampaguita St., Batasan Hills, na sinasabing nadamay lamang matapos tamaan ng ligaw na bala.

Naganap ang insidente dakong alas-12 ng madaling-araw sa Ilang-Ilang St., Brgy. Batasan Hills, QC, nang magkasalubong ng landas ang M5 gang at isa pang holdap gang sa nasabing lugar habang ang una ay hinahabol ng mga barangay tanod matapos na mabuko ang panghoholdap ng grupo nito sa Quezon City.

Isang Juvie Gandon, 25, service crew ng Persian restaurant ang hinoldap umano ng grupo ni Riguer at nang mabuko ay nakapanghingi ng tulong sa mga nagrorondang tanod sa nasabing lugar, agad namang hinabol ng mga tanod si Riguer at tatlo pa nitong kasamahan.

Matapos ang mahabang habulan, nasalubong ng grupo ni Riguer ang kalabang gang sa may Ilang-Ilang St. kaya’t nagkaroon ng barilan sa pagitan nito.

Sa insidenteng ito, agad napuruhan ng baril ng kalabang gang si Riguer na naging ikinamatay agad nito at aksidenteng tinamaan naman si Olbis na noon ay bibili lamang ng tinapay.

Dalawang miyembro ng M5 ang naaresto at nakilalang sina Jojo Lachica at Jefrey Hernandez na kapwa kasama ni Riguer.

Nakumpiska mula kina Lachica ang isang shotgun at patalim na ginamit sa panghoholdap kay Gandon.

Takdang sampahan ng kaukulang kaso sina Lachica at Hernandez habang nakapiit sa Fairview Police detention cell samantalang walang nahuli sa kalabang gang ng M5. (Ulat ni Angie dela Cruz)