P20-M ari-arian naabo sa bodega ng plastic

May P20 million halaga ang naabo matapos masunog ang isang bodega na pagawaan ng Orocan plastic sa Malabon City, kahapon ng umaga.

Ayon kay Sr/Insp. Sixto Bautista, Malabon Fire Marshall, ang nasunog ay ang Oracan Plastic factory na pag-aari ng isang Ramon Go, 58 ng 150 Panghulo Road, Brgy. Panghulo ng nasabing lugar.

Ayon sa ulat, nag-umpisa ang sunog sa gitnang bahagi ng bodega nang biglang umapoy umano ang isang makina dakong 9:15 ng umaga.

Tumagal ng dalawang oras ang sunog na umabot sa Task Force Echo bago ito tuluyang naapula dakong 11:30 ng umaga.

Wala namang iniulat na nasaktan sa nasabing sunog habang nagsasagawa ng imbestigasyon ang mga awtoridad para alamin ang sanhi ng sunog. (Ulat ni June Trinidad)