Koreanong rapist ng maid hinahanting ng pulis

Isang manhunt operation ang isinasagawa ngayon ng pamunuan ng Central Police District Office (CPDO) para sa ikadarakip ng isang Koreano na gumahasa sa kanyang katulong.

Nagreklamo sa tanggapan ni P/Supt. Rosendo Franco, ang biktimang si Armie, 19, katulong ng suspek na si Kim Won Gang,48, may-asawa.

Batay sa salaysay ng biktima naganap ang panggagahasa dakong alas-10 ng umaga noong Pebrero 12 sa bahay ng nasabing Koreano sa Cubao, Quezon City.

Ayon sa biktima, abala siya sa paglilinis ng bahay nila ng bigla siyang hilahin ni Gang at paghihipuan sa mga maseselang bahagi ng kanyang katawan.

‘‘Hindi pa siya nasiyahan binuhat ako ni Gang at dinala sa kanyang kuwarto at ginahasa,’’ anang biktima.

Sinabi ni Armie na matapos siyang gahasain ng kanyang amo ay kinulong siya sa kanyang kuwarto at tinakot na huwag magsusumbong.

‘‘Buti na lang may susi ako kaya mabilis akong nakalabas at nakapagsumbong sa mga pulis,’’ sabi ni Armie sa mga reporters na kanyang nakausap. (Ulat ni Jhay Mejias)