Life sa killer ng newsman

Habambuhay na pagkabilanggo ang parusang ipinataw ng Quezon City Regional Trial Court (QCRTC) sa isang 36-anyos na lalaking pumatay sa dating news editor ng People’s Tonight na si Danny Hernandez, limang taon na ang nakararaan.

Si Jacinto Alvarez Jr., alyas Nonong, may asawa, ng 46 Elga St., Brgy. Tatalon, QC, ay napatunayang nagkasala ng pagpatay at panghoholdap kay Hernandez noong 1997.

Sa 12-pahinang desisyon ni QCRTC Judge Theresa Yadao ng Branch 81, inatasan nito si Alvarez na bayaran ang pamilya ni Hernandez ng P50,000 bilang bayad-pinsala.

Lumilitaw sa rekord ng korte na si Hernandez ay pinatay ni Alvarez at isang Salvador Dizon alyas Boy sa isang insidente ng panghoholdap sa loob ng taxi sa kahabaan ng Circumferential Road at Dagat-Dagatan, Caloocan noong Hunyo 3, 1997.

Ibinasura naman ng korte ang dahilan ni Alvarez na siya ay pinahirapan ng mga pulis upang akuin ang naturang krimen.

Matatandaang walang buhay na natagpuan si Hernandez sa loob ng taxi sanhi ng tama ng baril sa batok.

Si Dizon ay nauna nang namatay sa isang encounter nito sa mga awtoridad. (Ulat nina Doris Franche at Angie Dela Cruz)