Kidnappers ng FX driver, timbog sa pay-off

Hindi na nakapalag ang tatlong kidnappers kabilang na dito ang isang dating pulis nang ito ay arestuhin ng mga awtoridad habang hawak ang ransom money sa naganap na pay-off sa tapat ng isang supermarket sa Quezon City,kamakalawa ng gabi.

Ang mga suspek ay nakilalang sina dating SPO2 Saturnino Egama,44,ng Batasan Hills ; Rolando Torres,45 ng Kamuning at Daniel Escora,27 ng Marikina City.

Ang mga suspek ay nahaharap sa kasong kidnapping na isinampa ng biktima na si Brian Mercado,31,FX driver at residente ng Camarin,Caloocan City.

Sa imbestigasyon ng pulisya,kinidnap ang biktima noong Biyernes ng alas-3:30 ng hapon ng mga suspek sa Phase 3-B, Camarin.

Nag-text ang mga suspek sa asawa ng biktima na si Helen Mercado na sinabi na ito ay kanilang kinidnap at kailangang magbayad ito ng P 8,000 bilang ransom money at ang bayaran ay magaganap harap ng Big R Supermarket dakong alas-7 ng gabi.

Humingi ng tulong si Mrs. Mercado sa pulisya at ikinuwento dito ang nangyaring pagkidnap sa kanyang asawa at ang pagbabayad ng ransom.

Lingid sa mga suspek na ang mga awtoridad ay nakapuwesto na sa lugar ng pagbabayaran ng ransom.

Dumating ang mga suspek sakay ng FX taxi (UPR-163) at nang makuha na ng mga suspek ang P 8,000 ay dito na kumilos ang mga pulis at inaresto ang mga suspek. (Ulat ni Angie dela Cruz)