Pulis nabaril ang sarili, todas

Binawian ng buhay kahapon ng umaga ang isang pulis matapos na aksidenteng mabaril nito ang kanyang sarili habang nagbibihis sa loob ng kanyang bahay, kamakalawa ng tanghali sa Makati City.

Nalagutan ng hininga habang nilalapatan ng lunas sa Makati Medical Center ang biktimang si PO2 Willie Gatchalian, nakatalaga sa Makati City Hall Detachment sanhi ng tama ng bala sa kanang pisngi na tumagos sa ulo buhat sa kanyang cal. 9mm.

Nasawi si Gatchalian dakong alas-10 ng umaga matapos na sumailalim sa maselang operasyon.

Ayon kay PO2 Ronald Digman ng Homicide section, naganap ang insidente dakong alas-11:15 ng tanghali sa bahay nito sa #4727 Kalayaan Ave., Makati City.

Nagbibihis umano ang biktima nang bunutin nito ang kanyang baril ay pumutok ito at tumama sa kanyang mukha. (Ulat ni Lordeth Bonilla)