Pulis Maynila,7 pa inaresto sa pangha-hijack

Isang pulis-Maynila at pito pa ang inaresto ng pinagsanib na puwersa ng National Bureau of Investigation (NBI) at Western Police District (WPD) kaugnay sa naganap na pangha-hijack sa isang container van na naglalaman ng rubber tires, kamakailan sa Caloocan City.

Nahaharap sa kasong paglabag sa PD 532 (Anti-Piracy and Anti- Highway Robbery law) ang mga suspect na nakilalang sina PO3 Romeo Noriega, 37; Joel Marcelo, 40; Alfredo Catubis, 31; Jay Byron Ilagan, 29; Rey Manalaysay, 36; Luis Flores, 31; Joaquin Malabanan, 39, at Frederick Manalaysay, 31.

Base sa imbestigasyon ng Domestic Intelligence Services Field, noong hapon ng Nobyembre 16 nang ma-hijack ang isang 40 ft. container van na naglalaman ng rubber tires na nagkakahalaga ng P.7 milyon sa pakikipagsabwatan ng driver na si Roger Lepasana.

Matapos malimas ang laman ng truck ay inabandona ng mga suspect sa may R-10 Road sa Navotas ang naturang sasakyan.

Sa isinagawang follow-up operation nasakote ang walong suspect habang dala pa ang ilang piraso ng rubber tires na kanilang hinayjack. (Ulat ni Ellen Fernando)