Sa pitong-pahinang desisyon ni Judge Monina Zenarosa ng Branch 76, ang pagkakaabsuwelto kina Chua Kien, alyas Leo Chui at Wu Wex , alyas Dennis Go ay batay na rin sa kawalan ng sapat na ebidensiyang iniharap ng prosecution laban sa dalawa.
Batay sa testimonya ng mga NBI agents, ang dalawang akusado ay inaresto noong Setyembre 22, 1999 sa Sanville Subdivision makaraang magbenta ng dalawang kilo ng shabu sa isang nagpanggap na buyer ng NBI.
Ang operasyon ay bunsod na rin sa pagkakadakip sa isang Roger Sy na nakuhanan din ng droga at drug paraphernalias sa kanyang bahay sa Tierra Evelina, Tandang Sora sa Quezon City. Si Sy umano ang nagbunyag sa NBI na ang dalawang Tsino ay mga supplier ng shabu.
Sa pahayag ni Kien sinabi nito na inaresto siya sa may Visayas Avenue at hindi sa Sanville Subdivision at hindi rin niya kakilala at kapwa niya akusado ang katunayan umano ay sa selda na ng NBI sila nagkita nito.
Itinanggi din ni Wex ang akusasyon na inaresto siya sa isang buy-bust operation.
Wala din umanong ebidensiya na ang nagpanggap na buyer ay nagpakita ng pera upang makumbinsi na siya nga ay bumili ng droga mula sa mga suspect. (Ulat ni Doris Franche)