Drug queen hinatulan ng habambuhay

Nakaligtas sa parusang bitay at habambuhay na pagkabilanggo lamang ang iginawad na hatol ng hukuman sa isang tinaguriang "drug queen" matapos na mapatunayang nagkasala dahil sa pag-iingat ng 296.5 gramo ng shabu noong 1999 sa Pasay City.

Sa 12-pahinang desisyon ni Judge Porfirio Macaraeg ng Pasay City Regional Trial Court (RTC) Branch 110, bukod sa nasabing hatol ang akusadong si Rufina "Ning" Lovina, 67, ay pinagbabayad ng korte ng halagang P250,000 bilang danyos perwisyo nito.

Sa rekord ng korte, inaresto si Lovina ng mga operatiba ng Narcotics Group ng Philippine National Police noong Enero 17, 1999 sa Tolentino St., nasabing lungsod matapos na makumpiskahan ng nasabing droga.

Sa kabila ng kinakaharap na kaso, itinanggi ni Lovina sa hukuman ang akusasyon ng awtoridad.

Gayunman, sa mga iniharap na ebidensya laban sa kanya ay napatunayan ng korte na siya ay nagkasala bagaman nakaligtas siya sa bitay. (Ulat ni Lordeth Bonilla)