Anthrax prankster ikakalaboso

Isang mabilisang kautusan ang pinagtibay kahapon ng Manila City Council para mapatawan ng kaparusahan ang sinumang mapapatunayang lilikha ng takot sa mga mamamayan sa pamamagitan ng panloloko sa anthrax.

Ang nasabing kautusan ay ipinanukala ni District 1 Councilor Isko Moreno na humikayat sa buong konseho na ipatupad ang istriktong hakbang na pinaiiral sa Amerika laban sa mga anthrax hoakers.

Sinasaad sa panukalang kautusan na lalapatan ng kaukulang multa na aabot mula P2,000 hanggang P5,000 ang sinuman na mapapatunayan at mahuhuli sa aktong lilikha ng pananakot sa pamamagitan ng pekeng anthrax.

Bukod dito, maaari ring makulong mula anim na buwan hanggang dalawang taon ang sinumang lilikha ng ganitong uri ng kaguluhan.

Hinikayat din ni Moreno ang Manila Health Department na magsagawa ng information campaign upang mabigyan ang mga mamamayan ng kaukulang kaalaman tungkol sa anthrax. ( Ulat ni Andi Garcia)