Bangag sinunog ang sariling bahay

Tuluyang nilukuban ng espiritu ng droga ang isang 37-anyos na adik matapos na totohanin nito ang kanyang banta na susunugin ang sariling bahay nang buhusan niya ito ng gas at saka silaban habang nasa loob ang kanyang asawa, kapatid at isang taong gulang na anak, kamakalawa ng gabi sa Marikina City.

Nakapiit ngayon sa Marikina Detention cell ang adik na si Alexander Solomon, 37, isang machine operator, ng 17 Rosal St., Barangay Malanday ng nabanggit na lungsod. Nahaharap ito ngayon sa kasong attempted arson at attempted homicide.

Sa ulat ng pulisya dakong alas-7:30 ng gabi ay umuwing bangag na bangag ang suspect sa kanilang bahay at nagsisisigaw na kanyang susunugin ang kanilang barangay.

Kumuha ito ng isang galong gas at binuhusan ang kanilang bahay at saka sinilaban habang natutulog sa loob ang kanyang misis na si Cecilia, 35; kapatid na si Edna, 40 at ang anak niyang babae.

Agad namang nagising ang kanyang pamilya at mabilis na nakalabas ng bahay. Mabilis din namang naapula ang paglaganap ng apoy sa tulong na rin ng kanilang mga kapitbahay.

Ang mga ito ang siyang sumukol sa addict na suspect. (Ulat ni Danilo Garcia)