Kaanak ng PNP official tiklo sa droga

Naaresto ng pulisya ang pinsan ni dating Cavite Provincial Director Sr. Supt. Samuel Pagdilao Jr. matapos itong maaktuhang nagbebenta ng ipinagbabawal na gamot kamakalawa ng gabi sa Malabon.

Kinilala ni Supt. Ernesto Fojas Jr., hepe ng pulisya, ang suspect na si Nathaniel Pagdilao, 29-anyos, binata ng #34 Int. Lanzones Road, Brgy. Potrero ng nabanggit na lungsod.

Base sa reklamo nina Rey Alba, Ceferino Lao at Rolando Lagrimas, mga kapitbahay ni Pagdilao, nabatid na lantaran umanong nagbebenta ng shabu ang suspect sa kanilang lugar na kahit sa katanghaliang tapat ay ‘naglalako’ ito.

Dahil dito kung kaya’t kaagad na nagsumbong ang dalawa sa pulisya at inatasan ni Fojas ang kanyang mga tauhan na puntahan ang naturang lugar at magsagawa ng buy-bust operation laban sa suspect.

Nakuha mula sa suspect ang may 21 piraso ng plastic sachet ng umano’y shabu at mga drugs paraphernalia.

Pagdating sa himpilan ng pulisya, tahasang ipinagmalaki umano ng suspect sa mga kagawad ng Malabon police na anumang oras ay maaari siyang makalaya dahilan sa pinsan umano niya si dating Cavite Provincial Director Pagdilao na kasalukuyang nasa floating status. (Ulat ni Gemma Amargo)