Binata pinatay ng kaibigan dahil sa droga

Binaril at napatay ng isang 38-anyos na lalaki ang kanyang kaibigan matapos umanong magkaonsehan sa droga, kamakalawa ng hapon sa Navotas.

Dead-on-the-spot sanhi ng tama ng bala ng baril sa ulo ang biktimang si Jose Diaz, 20, at naninirahan sa A. Cruz St., Tangos, ng nabanggit na bayan.

Mabilis namang tumakas dala ang baril na ginamit sa krimen ng suspect na si Jessie Lerona, ng nabanggit ding lugar.

Ayon sa imbestigasyon ng pulisya, dakong alas-12:30 ng tanghali nang maganap ang naturang krimen malapit sa bahay ng biktima.

Nabatid na habang naglalaro ng baraha ang biktima ay nilapitan ito ng suspect sa likod at bigla na lang binaril sa ulo gamit ang isang .38 kalibreng baril. (Ulat ni Gemma Amargo)