Pulis-QC hinatulang mabitay sa pagtutulak ng shabu

Parusang kamatayan ang inihatol ng Malabon Regional Trial Court laban sa isang Quezon City police, samantalang habambuhay na pagkabilanggo sa kasamahan nito, matapos na mapatunayang nagtutulak ng ipinagbabawal ng gamot anim na buwan na ang nakakalipas.

Si PO1 Marlow de Guzman nakatalaga sa Central Police District Office (CPDO) ay hinatulan ni Judge Benjamin Villanueva ng parusang kamatayan, habang habambuhay na pagkabilanggo naman ang ipinataw na parusa sa kasama nitong si Jesus Villanueva.

Base sa 9 na pahinang desisyon ng korte, noong nakaraang Marso 23, 2001 nang arestuhin ang dalawang akusado ng mga tauhan ng National Bureau of Investigation (NBI) sa isinagawang buy-bust operation sa Tumariz St., Tugatog, Malabon.

Napag-alaman na naganap ang bilihan ng droga sa loob ng kotse ng isang NBI agent na nagpanggap na posuer buyer at personal na iniabot ang pera kay Villanueva kasama si De Guzman kapalit ng dalawang kilo ng shabu.

Sa panig naman ng akusado, sinabi ng mga ito na ‘planted’ lamang ang mga nakuhang mahigit sa dalawang kilo ng shabu sa kanila at walang naganap na transaksyon sa nasabing lugar. Hindi naman ito pinaniwalaan ng korte. (Ulat ni Gemma Amargo)