Lider ng KFR group nalambat

Bumagsak sa kamay ng pulisya ang itinuturing na pinaka-notoryus na lider ng isang big-time kidnap-for-ransom (KFR) group sa bansa sa isinagawang operasyon sa Quezon City.

Batay sa sketchy report na nakalap mula sa Philippine National Police-Intelligence Group (PNP-IG), nakilala ang nadakip na KFR group leader na si Tito Medina na siyang lider ng grupong binansagang "Tito Medina group."

Ito ay nadakip dakong alas-12:30 ng gabi noong Sabado nang salakayin ng mga operatiba ng PNP-IG ang safehouse nito sa Sct. Alcaraz, Sta. Mesa Heights, Quezon City.

Hindi pa madetermina sa ulat kung may nasamsam na armas o iba pang ebidensiya mula sa suspek.

Ayon sa rekord ng pulisya, ang nasabing grupo umano ni Medina ay siyang responsable sa nangyaring pagdukot kamakailan sa mga negosyanteng sina Marco Sia noong Agosto 14 sa San Jose del Monte, Bulacan at isang Jake Ocampo.

Nakatakdang iharap sa mga mamamahayag ang suspect sa Camp Crame. (Ulat ni Joy Cantos)