Hindi na nakarating ng buhay nang isugod sa Mandaluyong City Medical Center ang biktima na si Lawrence Beltran, 20, binata, isang house painter, nakatira sa No. 419 Blumentritt St., Barangay Old Zaniga, ng lungsod na ito sanhi ng saksak sa tiyan.
Pinaghahanap naman ng mga kagawad ng Mandaluyong City Police ang suspect na si John Eric Mortel, 18, 3rd year high school at nakatira sa No. 4527 Valenzuela St., Old Sta. Mesa, Manila.
Samantala, dinakip naman ng mga rumespondeng pulis sina Mary Joy Cabra, 18 ang debutante; Michael 20 at Mark Anthony Cabra, 18; Santiago Francial, 44, electrician; Lyndon Ribariz, 21; Romeo Balbero, 19, janitor; Enrico Vicencio, 20; Ronald Alcantara, 18; Pio Samson Jr., 21; Tong Tatoco, 20, at Reynante Pagal, 19, pawang nakatira sa nabanggit na barangay.
Base sa imbestigasyon ni SPO2 Guillermo Boy, may hawak ng kaso, naganap ang insidente dakong alas-2:30 ng madaling-araw sa Blumentritt St., ng nasabing barangay.
Nabatid na ang debut party ni Mary Joy ay isinagawa sa nabanggit na lugar at habang nagsasaya ang mga ito, hindi inaasahang maganap ang isang rambol sa hindi pa mabatid na dahilan.
Nagkagulo ang mga bisita sa nasabing okasyon na naging dahilan upang masaksak ang biktima. (Ulat ni Lordeth Bonilla)