Veterinary student dinukot ng mga armado

Kinidnap ng hindi pa nakikilalang mga armadong kalalakihan ang isang 19-anyos na veterinary student habang ito ay papalabas sa pinapasukan nitong unibersidad, kahapon ng tanghali sa Malabon.

Kinilala ni Supt. Ernesto Fojas, hepe ng Malabon police ang biktimang si Nino Lorenzo Tobiano, student sa Gregorio Araneta University Foundation na nasa Araneta Avenue, Barangay Potrero, Malabon.

Base sa sketchy report, dakong alas-12:30 ng tanghali ng harangin at sapilitang isakay ng mga armadong kalalakihan ang biktima sa isang kotseng Toyota Corolla habang isa pang Nissan na kotse ang nagsilbing back-up nito.

Binanggit sa ulat na naglalakad ang biktima sa labas ng naturang unibersidad nang dukutin ng mga suspect.

Habang sinusulat ang balitang ito ay patuloy na nagsasagawa ng imbestigasyon ang pulisya tungkol sa naturang insidente. (Ulat ni Gemma Amargo)