Hepe ng MMDA traffic pinalitan

Nahaharap ngayon sa malaking paghamon ang pamunuan ng Metropolitan Manila Development Authority -Traffic Enforcement Group matapos na palitan ang kanilang hepe at magbigay ng anim na buwang deadline si Pangulong Gloria Macapagal-Arroyo upang lunasan ang problema sa trapiko .

Pinalitan ni Supt. Luisito Maralit bilang hepe ng MMDA-TEG si Senior Supt. Vicente Raval Sr.

Nahaharap ngayon si Maralit sa matinding problema kung papaano paluluwagin ang trapiko dahil sa abusadong mga tsuper, illegal terminals, sidewalk vendors at iba pang obstruksyon sa kalsada.

Bukod sa ipinatutupad na color coding scheme, tumutulong rin ang mga lokal na pulisya sa pamamahala ng trapiko.

Partikular na pinagtutuunan ng pansin ay ang pagkakaloob umano ng mga lokal na pamahalaan ng permiso sa mga terminal ng pampublikong jeep at bus.

Nakiusap na si MMDA Chairman Abalos sa mga lokal na Mayor na pansamantalang itigil muna ang pagbibigay ng permits sa mga ito para mabawasan ang pagsisikip ng kalsada. (Ulat ni Danilo Garcia)