Pulis, kolektor tiklo sa kotong

Isang traffic policeman at kanyang kasabwat na kolektor ang inaresto ng mga kagawad ng CIDG matapos ang isinagawang entrapment operation, kamakalawa ng gabi sa Pasig City.

Kinilala ni Inspector Danilo Pecana, hepe ng EPD-CIDG ang mga nadakip na sina PO2 Raul Telan, nakatalaga sa EPD- Traffic Enforcement Unit at ang kasabwat nitong si Renato Macalalad, 46, ng lungsod na ito.

Ayon kay Pecana, nagtungo umano sa kanilang himpilan ang ilang mga opisyal ng Buting TODA at inireklamo ang ginagawang pangingikil umano sa kanila nina Telan ng P500 kada linggo bilang protection money.

Si Macalalad naman umano ang umaaktong kolektor ni Telan upang hindi mabisto ang pulis.

Dahil dito, agad na inihanda ng mga awtoridad ang entrapment operation at dinakip sina Telan at Macalalad na aktong tinatanggap ang protection money sa mga tricycle driver. (Ulat ni Danilo Garcia)