Bagets na rapist lusot sa bitay

Dahil sa pagiging menor-de-edad isang 16-anyos na bagets na ipinagharap ng kasong rape ang nakaligtas sa parusang kamatayan at nahatulan ng parusang 17-taong pagkabilanggo makaraang gahasain ang isang grade V pupil noong 1999 sa Makati City.

Sa 11-pahinang desisyon ni Makati City Regional Trial Court Judge Ricardo Rosario, ang hinatulan ay nakilalang si Jay-Ar Bartolome, ng PRC Compound, Barangay Carmona ng lungsod na ito.

Base sa rekord ng korte, naganap ang krimen noong Pebrero 2, 1999 habang ang biktima na itinago sa pangalang Minnie, 13, grade V pupil ay natutulog sa kanilang bahay kasama ang 14-anyos na pinsan nang halayin ng suspect.

Sa kabila nang pagtanggi ng akusado sa naturang krimen hindi ito pinaniwalaan ng korte.

Bukod sa 17-taong pagkabilanggo, pinagbabayad din ng hukuman si Bartolome ng halagang P50,000 bilang danyos perwisyo sa biktima. (Ulat ni Lordeth Bonilla)