Maid nakuryente habang nagsasampay

Namatay ang isang 24-anyos na katulong nang ito ay makuryente at malaglag sa tinutuntungang hagdanan habang nagsasampay ng nilabhang damit, kamakalawa ng gabi sa Quezon City.

Kinilala ni SPO4 Mar Castillo, imbestigador ng Criminal Investigation Unit (CIU) ng Quezon City Police ang biktimang nakilalang si Cherrylyn Balberona, stay-in maid sa 380 Scout Reyes, Brgy. Paligsahan ng nabanggit na lungsod.

Sa pagsisiyasat ng pulisya, hindi umano napansin ng biktima ang alambre na kanyang sasampayan ay mayroong ‘ground’ at nang humawak doon ang biktima ay nakuryente ito.

Dahil dito, tuluyang nakabitiw ang biktima at nahulog sa tinutuntungan nitong hagdanan hanggang sa bumagsak at mabagok pa ang ulo na nagsanhi sa agaran nitong kamatayan. (Ulat ni Doris Franche)