Nakakalasong isdang Barracuda at Torsillo ginagawang fishball

Dahil hindi na nabibili ang isdang Barracuda at Torsillo matapos ang panawagan ng Department of Health na ito ay kontaminado ng matinding lason, siya naman itong sinasamantala ng mga negosyante para gawing fishball.

Nabatid na sa kabila na hindi pinapansin ang mga nabanggit na isda sa fishport ng Navotas at Malabon ito naman umano ay pinapakyaw ng mga negosyante mula sa Blumentritt, Divisoria, Quinta at Novaliches para gawing fishball.

Sa kamurahan ng presyo ng Barracuda at Torsillo ito ngayon ay siyang ginagamit sa paggawa ng fishball.

Bagaman wala pang naitala o naiulat na pagkalason mula sa pagkain ng fishball ay hinikayat pa rin ng DOH na hanggat maaari ay huminto muna sa pagkain ng fishball dahil hindi tiyak kung anong isda ang ginamit dito.

Nanawagan din ang DOH sa manufacturer ng fishball na kung maaari ay huwag munang gumamit ng mga nasabing kontaminadong isda hanggat hindi pa natatanggal ang toxic contamination nito. (Ulat ni Andi Garcia)