Malonzo puwedeng OIC ng Caloocan

Posibleng si Caloocan City Mayor Reynaldo Malonzo ang maupong officer-in-charge sa lungsod kahit na hindi maiproklama ito hanggang June 30 ng Commission on Elections (Comelec).

Ayon kay DILG director Rolando Acosta ng Bureau of Local Government Service, puwedeng italaga pa rin ni Pangulong Gloria Macapagal-Arroyo si Malonzo bilang officer-in-charge ng City government kung hindi ito maiproklama ng Comelec hanggang June 30 sang-ayon sa guidelines ng DILG na isinumite sa Malacañang.

Sinabi ni Director Acosta, nasa hurisdiksyon ng Palasyo kung nais nilang palitan ang ilang section sa guidelines na aming isinumite hinggil sa pagkakaroon ng bakante sa posisyon sa lokal na pamahalaan.

Aniya, prerogatibo ng Malacañang kung mayroon silang nais baguhin sa guidelines partikular ang pagkakaroon ng bakante sa posisyon sa local government unit (LGU) sa pagkabigong maiproklama ang nanalong kandidato at dahil sa pagkakaroon ng failure of elections. Sa punto ng partial proclamation naman ay susundin dito ang rule of succession. (Ulat ni Rudy Andal)