9 anyos napag-tripan, hinostage ng adik

Isang 9-anyos na batang babae ang nasugatan matapos na pagtripang i-hostage ng isang adik kahapon ng umaga sa Malabon City.

Si Roscel Janabon, grade 1 pupil ng Epifanio Elementary School at residente ng Tugatog ng nasabing bayan ay nagtamo ng sugat sa pisngi matapos itong hiwain ng basag ng flourescent lamp ng suspect na nakilalang si Bonifacio Rubia, 30 ng Phase 9, Damayan Bagong Silang, Caloocan City.

Batay sa imbestigasyon ni SPO3 Danilo Sugui, dakong alas- 10:30 ng umaga ng bigla na lamang pasukin ng suspect na armado ng basag na flourescent lamp at martilyo ang bahay ng biktima.

Hinostage nito sa walang kadahi-dahilan ang biktima at matapos ang ilang minutong negosasyon ay pinakawalan din nito ang bata matapos na hiwaan sa kanang pisngi.

Nabatid na bangag sa ipinagbabawal na gamot ang suspect at maaaring napag-tripan nito ang paslit.

Ang suspect ay nakapiit ngayon sa himpilan ng pulisya. (Ulat ni Gemma Amargo)