'Mahiwagang' election returns natagpuan sa kahon ng sardinas

Muling naghari ang tensyon sa loob ng Bulwagang Bonifacio sa Caloocan City hall na dito ginaganap ang bilangan ng mga balota matapos na dumating ang isang kahon ng sardinas na naglalaman ng may 19 na election returns.

Ayon sa mga kagawad ng Caloocan Police Special Weapons and Tactics (SWAT) na sa kabila ng mahigpit nilang pagbabantay ay nakalusot pa rin ang mga nabanggit na election returns na nakalagay sa kahon ng sardinas at bitbit ng isang miyembro ng Comelec.

Nabatid na nauna nang sinita ng mga pulis ang nasabing tauhan ng Comelec na tumangging magbigay ng kanyang pangalan. Binanggit pa ng mga pulis na ipapaamoy umano sana nila sa K-9 dog ang naturang kahon subalit tumanggi ang tauhan ng Comelec at dire-diretso itong pumasok sa loob ng canvassing area.

Nagulat na lamang ang mga awtoridad ng magkaroon ng komosyon sa loob ng Bulwagang Bonifacio at makita sa harapan ni Atty. Calixto Ramos, chairman Board Canvasser ang kahon. (Ulat ni Gemma Amargo)