Batay sa walong pahinang petisyon na inihain ni incumbent Congresswoman Rosenda Ocampo sa komisyon, hiniling nitong ipadiskuwalipika si Jimenez na kung saan ibinabatay nito ang petisyon sa Sec. 68 ng Omnibus Election Code na nagsasaad ng pagdiskualipika sa sinumang kandidatong mapapatunayang nagbibigay ng pera at iba pang material na bagay upang positibong maimpluwensiyahan ang kandidatura nito.
Ayon kay Ocampo ang nasabing petisyong inihain ay base sa testimonya ng 11 residente na nagpapatunay na si Jimenez ay nagbigay ng tig-P500 hanggang P1,000 sa mga residente kapalit umano ng mga boto ng mga ito.
Bukod sa pagmumudmod ng salapi nagkaloob pa rin umano si Jimenez ng mga plastic ng groceries na may tatak na "Mark to Win" na ipinamimigay ng mga tinatawag na "Mark Jimenez Angels".
Bukod dito, inaasahang aabot pa sa 138 ang nakahandang tumestigo upang patunayan ang nasabing paglabag sa Omnibus election code ni Jimenez. (Mga ulat nina Jhay Mejias at Andi Garcia)