3 Pinoy na nagtangkang pumuslit sa Amerika nasakote

Tatlong turistang Pilipino na nagtangkang pumunta sa Amerika mula sa Indonesia ang pinabalik sa Pilipinas makaraang matuklasan na pawang peke ang kanilang taglay na travel documents.

Sa ulat na tinanggap ni BI Commissioner Andrea Domingo mula kay Danilo Almeda, head supervisor ng BI-NAIA, ang mga pasahero na nagtataglay ng mga palsipikadong travel documents ay sina Laila Evangelista, a.k.a. Nora Castillo Carabbacan, may hawak ng Philippine passport no. TD IV7982001; Marilyn P. Millanez, a.k.a. Alorinae Amuyot Samaniego, may Philippine passport no. TD IV7972001; at Arnulfo Vargas, a.k.a. Hermenigildo Sahilil Estigoy, may tangang Philippine passport no. DD926087.

Ang tatlong pasahero ay dumating kahapon sakay ng Brunei Airways flight BI 681 mula sa Jakarta via Bendar Seri Begawan.

Sa isinagawang imbestigasyon ni BI Supervisor Mike Palon, sina Evangelista at Milañez ay pinauwi sa Pilipinas matapos kumpiskahin ang kanilang mga pasaporte ni Zaldy Patron, Third Secretary at Vice Consul ng Embahada ng Pilipinas sa Jakarta matapos matuklasang pawang mga palsipikado ang kanilang dokumento.

Samantala, ang pekeng US visa naman ni Vargas ay nakita sa pahina 27 ng kanyang pasaporte.

Inamin ng dalawang babae na ang kanilang travel documents ay inayos ng isang nagngangalang Bobby Jimenez sa halagang P280,000 bawat isa, samantalang nagbayad naman si Vargas ng P200,000 sa isang Benjamin Tan upang makakuha ng pekeng US visa.

Ayon pa kina Evangelista at Jimenez, balak nilang pumunta sa Amerika mula Indonesia upang doon ay makapagtrabaho. (Ulat ni Butch Quejada)