Hindi nabigyan ng bonggang kasal ang nobya, binata nagpakamatay

Dahil sa inabot na matinding kahihiyan matapos na mabigong maibigay ang hinihinging marangyang kasal ng kanyang kasintahan, isang 22-anyos na binata ang nagbigti sa Paco, Maynila.

Si Jayson Suyat, sales representative ng motorcycle company at residente ng #1665 Int. 40 Linao st., Paco ay natagpuang nakabitin sa kanyang kuwarto na may nakapulupot na tela sa leeg.

Lumilitaw na malapit na umanong ikasal si Suyat matapos na mabuntis nito ang kanyang nobya.

Bagaman hindi tumutol ang biktima sa takda nitong pagpapakasal ay labis nitong pinroblema ang hinihinging bonggang kasalan ng kanyang magiging mga biyenan na isa umano sa mga kondisyones.

Kamakalawa ng alas-12:30 ng hapon huling nakitang buhay ang biktima nang umuwi ito ng bahay na malungkot na hinihinalang ang nalalapit niyang kasal ang dahilan. (Ulat ni Ellen Fernando)